Ymarfer Llawfeddygol Uwch (MSc)

Sut y caf fy addysgu?

Mae ystod eang o arddulliau addysgu a dysgu yn cael eu defnyddio drwy gydol y cwrs, a gyflwynir drwy fformat e-ddysgu ar amgylchedd dysgu rhithwir Prifysgol Caerdydd, Dysgu Canolog™. Mae'r cwrs yn cynnwys nifer o fodiwlau gorfodol ac mae gan rai eraill is-bynciau sy’n cynnig dewis i chi.

Defnyddir amrywiaeth o gyfryngau i gyflwyno'r cynnwys:

• Modiwlau ar-lein, rhyngweithiol
• Cyflwyniadau PowerPoint wedi’u trosleisio
• Dolenni i adnoddau eraill ar-lein
• Cyflwyniadau

Y myfyriwr fydd yn dewis asesiadau modiwlau a phynciau traethawd hir, ond mae'n rhaid i dîm y rhaglen eu cymeradwyo.

I raddau helaeth, bydd astudiaethau ar lefel traethawd hir MSc yn golygu astudiaeth ac ymchwil annibynnol dan arweiniad, gan ddefnyddio’r cyfleusterau dysgu ac ymchwil helaeth sydd ar gael.  Bydd goruchwyliwr prosiect yn cael ei ddynodi i’ch cefnogi a’ch cynghori ar ymchwilio i bwnc eich traethawd hir penodol a’i ysgrifennu.  

Sut y caf fy asesu?

Mae'r asesiadau wedi'u dewis i sicrhau bod y deilliannau dysgu yn cael eu profi'n briodol ac yn rhoi cyfle i fyfyrwyr ddangos eu bod wedi eu bodloni.  Bydd dulliau asesu modiwlau penodol ar gyfer pob modiwl yn cael eu pennu gan y Bwrdd Astudiaethau perthnasol ac mae eu manylion ar gael yn y Disgrifiad o’r Modiwl perthnasol.

Defnyddir amrywiaeth o ddulliau asesu ffurfiannol a chrynodol, fel:

• Cynlluniau/fersiynau drafft o Aseiniadau Ysgrifenedig
• Aseiniadau Ysgrifenedig
• Cwestiynau amlddewis
• Blogiau myfyriol
• Gwaith grŵp

Bydd traethawd hir yr MSc yn cael ei asesu’n gyfan gwbl ar sail y traethawd hir terfynol. Bydd y disgwyliadau ar gyfer fformat, cyflwyno a marcio'r traethawd hir yn dilyn y Rheoliadau Asesu cyfredol, a ategir lle bo'n briodol gyda gofynion ychwanegol y Rhaglen/Ysgol/Coleg ac unrhyw ofynion penodol sy'n deillio o natur y prosiect a gynhaliwyd.

Sut y caf fy nghefnogi?

Darperir cymorth ar-lein drwy fyrddau trafod e.e., i drafod cynnwys modiwlau, syniadau asesu, datblygu asesiadau, materion clinigol. Fe'ch anogir i gyfrannu’n rheolaidd i'r byrddau trafod ar Dysgu Canolog, lle cewch eich cefnogi gan dîm y rhaglen a phanel o arbenigwyr clinigol. Byddwch yn gallu cynllunio a myfyrio ar yr hyn rydych wedi’i ddysgu mewn modiwlau ac asesiadau unigol, drwy eich blog personol eich hun (gellir tynnu hwn i'w gynnwys mewn Portffolios Proffesiynol/dilysu proffesiynol, ail-ddilysu). Ar ben hynny, bydd cyfleoedd rheolaidd i gael cyfarfodydd ar-lein gyda'r staff academaidd.

Caiff tiwtor personol ei neilltuo i bob myfyriwr i gael cymorth a chefnogaeth gydag anghenion academaidd a bugeiliol, a bydd yn cysylltu'n rheolaidd i drafod cynnydd a chynnig cyngor ac arweiniad fel bo angen.  Rhoddir adborth ysgrifenedig helaeth ar bob asesiad i'ch helpu a'ch arwain ar gyfer asesiadau yn y dyfodol.

Adborth

Er mwyn eich helpu a'ch arwain gyda'r gwaith o gynllunio, ysgrifennu a datblygu asesiadau, bydd adborth ffurfiannol yn cael ei roi drwy ein “stiwdio adborth” – rhoddir cyfarwyddyd penodol ar hyn ar fodiwl 1.  Rhoddir adborth crynodol yn dilyn asesiadau o fewn yr amser a nodir gan y Brifysgol.

Bydd goruchwyliwr personol yn cael ei ddynodi i fyfyrwyr yn ystod y cyfnod traethawd hir. Bydd yn rhoi adborth ysgrifenedig ar fersiynau drafft o’r traethawd hir, ac yn rhoi cyfle i fyfyrwyr drafod unrhyw ymholiadau sydd ganddyn nhw.

Pa sgiliau y byddaf yn eu hymarfer a’u datblygu?

Mae'r Deilliannau Dysgu ar gyfer y Rhaglen hon yn disgrifio'r hyn y byddwch yn ei gyflawni erbyn diwedd eich rhaglen ym Mhrifysgol Caerdydd ac yn nodi'r wybodaeth a'r sgiliau y dylech eu datblygu. Byddant hefyd yn eich helpu i ddeall yr hyn a ddisgwylir gennych.

Ar ôl cwblhau eich Rhaglen yn llwyddiannus byddwch yn gallu gwneud y canlynol:

Cael y cyfle i gymhwyso cyfoeth o sgiliau a galluoedd yn eich lleoliad proffesiynol.  Yn ogystal â dealltwriaeth gysyniadol well o wybodaeth, ystyriaethau a dulliau cyfredol, byddwch yn ymarfer ac yn cymhwyso galluoedd mewn dadansoddi beirniadol, cymhwyso meddygaeth ar sail tystiolaeth ac ymdrin â materion cymhleth yn systematig ac yn greadigol. Yn ystod eich astudiaethau, byddwch yn defnyddio sgiliau datrys problemau a gwneud penderfyniadau drwy ddefnyddio tystiolaeth yn effeithiol a chyfleu cysyniadau pwysig i gydweithwyr ac eraill.  Drwy'r elfennau sy'n canolbwyntio ar ymchwil, byddwch yn cymhwyso sgiliau mewn adolygu llenyddiaeth, gwerthuso beirniadol, dylunio ymchwil, methodolegau ymchwil, casglu data, dadansoddi data ac egwyddorion ymchwil.

Nod y cwrs yw hwyluso myfyrwyr i gymhwyso eu gwybodaeth hyd at lefel uwch ym maes eu harbenigedd neu ddiddordeb ym maes llawfeddygaeth. Fodd bynnag, gwneir hyn o fewn cyd-destun ehangach, sy'n caniatáu i'r myfyriwr ddeall sut mae lefel ei arbenigedd a'i sylfaen wybodaeth yn cyd-fynd ag ymarfer rhyngbroffesiynol yn gyffredinol.

Mae Deilliannau Dysgu’r Rhaglen hon yn disgrifio'r hyn y byddwch chi’n gallu ei wneud o ganlyniad i astudio ym Mhrifysgol Caerdydd. Byddant yn eich helpu i ddeall yr hyn a ddisgwylir gennych. 

Gwybodaeth a Dealltwriaeth:

• Integreiddio gwybodaeth am agweddau amlddimensiwn ymarfer llawfeddygol o wahanol ddisgyblaethau er mwyn rheoli cleifion o safbwynt cyfannol.
• Cymhwyso gwybodaeth ryngbroffesiynol, sy'n seiliedig ar dystiolaeth am ymarfer llawdriniaethol i gefnogi unrhyw fentrau clinigol ac addysgol.
• Ysgrifennu adolygiadau sy'n seiliedig ar dystiolaeth sy'n llywio gofal cleifion/addysg glinigol;

Sgiliau Deallusol:

• Herio dulliau traddodiadol o gysyniadu ymarfer llawfeddygol drwy fframio cwestiynau clinigol ar gyfer eich asesiad, casglu tystiolaeth, asesu'r dystiolaeth honno a ffurfio argymhellion.

Sgiliau Ymarferol Proffesiynol:

• Archwilio ymarfer cyfredol a gwerthuso dulliau traddodiadol ac agweddau tuag at ymarfer llawfeddygol.

Sgiliau Trosglwyddadwy/Allweddol:

• Meddu ar ymagwedd feirniadol a dadansoddol at ymarfer llawfeddygol mewn ystod o leoliadau iechyd.
• Nodi meysydd ar gyfer gwella ansawdd yn ymarferol.
• Cyfuno ac ystyried ymestyn ymarfer presennol drwy weithgareddau ymchwil.