Prifysgol Caerdydd yn codi sawl lle yn Rhestr QS o Brifysgolion Gorau’r Byd

Mae Prifysgol Caerdydd wedi codi pum lle yn Rhestr QS o Brifysgolion Gorau’r Byd. Mae bellach yn safle 181.

Mae hyn yn ailgadarnhau statws y Brifysgol yn sefydliad addysgu ac ymchwilio blaenllaw drwy’r byd.

Mae Rhestr QS o Brifysgolion Gorau’r Byd ymhlith y gwerthusiadau annibynnol y mae pobl yn cyfeirio atyn nhw fwyaf o’r 1,500 prifysgol orau yn y byd.

Mae’n seiliedig ar farn 175,000 o staff academaidd a 105,000 o gyflogwyr, gan gynnwys data ar ddosbarthiad a pherfformiad 17 miliwn o bapurau ymchwil.

Mae naw mesur, sy’n cynnwys Enw Da Academaidd, Cynaliadwyedd a Nifer y Cyfeiriadau, yn cael eu defnyddio i restru sefydliadau.

Mae Prifysgol Caerdydd yn safle 26 o’i chymharu â’r 90 sefydliad yn y DU sydd wedi’u cynnwys yn y tabl eleni. Mae’r Brifysgol wedi gwella mewn meysydd sy’n cynnwys y Rhwydwaith Ymchwil Ryngwladol, y Gymhareb Staff-Myfyrwyr a Chanlyniadau Cyflogaeth.

Daw’r newyddion wythnos ar ôl i Brifysgol Caerdydd godi sawl lle yn Complete University Guide, lle mae ymhlith y 25 prifysgol orau yn y DU.

Dywedodd yr Is-ganghellor, yr Athro Wendy Larner: “Mae'n galonogol iawn gweld Prifysgol Caerdydd yn codi sawl lle yn Rhestr QS o Brifysgolion Gorau’r Byd. Mae'n adlewyrchu ymroddiad ac arbenigedd cymuned gyfan y Brifysgol.”

“Mae hyn, a'r ffaith ein bod wedi codi sawl lle yn Complete University Guide yn ddiweddar, yn newyddion da i’n staff, ein myfyrwyr a’n cyn-fyfyrwyr drwy helpu i wella enw da’r Brifysgol a’u henw da nhw eu hunain yn y farchnad fyd-eang.”