Prosiectau sbarduno

Ysgolion Academaidd: Ysgol Meddygaeth a'r Sefydliad Ymchwil Imiwnedd Systemau

Ymchwilwyr: Dr You Zhou, yr Athro Valerie O’Donnell, yr Athro Andrew Godkin

Aeth You Zhou a'r tîm ati i:

• ddatblygu modiwl NAFLD cyffredin ac
• integreiddio setiau data a modelu sut roedd y clefyd yn datblygu.

Cyflawnwyd y ddau amcan yn llwyddiannus a thrwy eu gwaith sbarduno, cryfhawyd cydweithio buddiol gyda'r Athro Christopher Byrne (Prifysgol Southampton) a'r Athro Professor Hannele Yki-Järvinen (Prifysgol Helsinki, y Ffindir).

Bu'r tîm yn siarad mewn Gweithdai, seminarau a chynadleddau yng Nghaerdydd, Southampton a Helsinki. Yn y cyntaf o'r rhain, bu myfyriwr meddygaeth o Brifysgol Caerdydd, Nicholas Hodson, yn annerch cynulleidfa o 250 - y siaradwr ieuengaf a'r unig fyfyriwr.

Dywedodd You Zhou, "Gyda chefnogaeth y dyfarniad sbarduno, rydym ni wedi datblygu llinell modelu cyfrifiadurol (datblygwyd gyda chefnogaeth y Sefydliad). Mae ein gwaith wedi'i gyhoeddi'n ddiweddar mewn cyfnodolyn grŵp cyhoeddi natur gyda ffactor effaith o 5.638. Fi yw'r cydawdur cyntaf ac mae'r gronfa sbarduno wedi'i chydnabod yn uchel yn y papur."

"Ymhellach, ar y cyd â Phrifysgol Southampton, rydym ni wedi cyflwyno cais i gronfa Rhaglen Gwerthuso Effeithlonrwydd a Mecanwaith yr NIHR ac MRC (cyfanswm o £675,864, 11.8% i Gaerdydd). Mae'r cais yn dal yn i fynd drwy'r broses ddethol, ar ôl llwyddo yn y cylch cyntaf."

Am ragor o fanylion cysylltwch â Dr You Zhou.

Ysgolion Academaidd: Yr Ysgol Ffiseg a Seryddiaeth a'r Ysgol Seicoleg

Ymchwilwyr: Dr Leandro Beltrachini (PI), Dr Andreas Papageorgiou, Dr Cyril Charron, yr Athro Kevin Murphy, Dr Joseph Whittaker, yr Athro Matt Griffin

Aeth Leandro a'r tîm ati i:

• asesu'r adnoddau diweddaraf yn yr ystorfeydd data niwroddelweddu
• cynllunio strwythur Canolfan Data Niwroddelweddu o'r dechrau i'r diwedd
• cynnal astudiaeth beilot gyda data sy'n bodoli
• amlinellu cynnig grant mawr.

Cyflawnwyd yr holl amcanion. Disgrifir canlyniadau'r astudiaeth yn fanwl mewn adroddiad sydd wedi'i ddefnyddio i hyrwyddo'r syniad o Ganolfan ac Archif Data ar draws Canolfan Ymchwil Delweddu'r Ymennydd (CUBRIC), drwy ddarparu diffiniad cynhwysfawr o strwythur a gweithrediad sefydliad o'r fath.

Elfen allweddol o'r gwaith oedd dod â thîm amlddisgyblaethol at ei gilydd o ddwy Ysgol. Dros gyfnod y prosiect, cryfhaodd y cydweithio hwn a disgwylir y bydd y gweithgor dilynol a'i nodau'n parhau i weithredu, gan ehangu cwmpas y gwaith presennol hwn a chwilio am gyllid pellach. Ymhellach, mae'r grŵp wedi datblygu cysylltiadau agos a chyd-fuddiannau gyda'r Gweithgor Gwyddoniaeth Agored yn CUBRIC, ac maen nhw wedi cytuno i drafod y prosiect hwn ymhellach, yn ogystal â cheisiadau yn y dyfodol.

Nod ychwanegol i'r gwaith hwn oedd datblygu'r cysyniad a dangos buddion Prosesu ac Archifo Data cyffredin ar draws y sefydliad o fewn CUBRIC. Mae'r astudiaeth hon wedi sicrhau'r profiad a'r deunydd angenrheidiol ar gyfer dechrau mynd i'r afael â'r her. O ganlyniad, ceir cynlluniau i gyflwyno'r gwaith mewn sgyrsiau a chyflwyniadau ar draws CUBRIC, â'r nod o gynnwys yr holl grwpiau offerynnau gwahanol yn CUBRIC.

Dywedodd Leandro, "Yn y prosiect sbarduno hwn, aethom ati i drosi arferion rheoli data a ddatblygwyd yn ein grantiau STFC ac UKSA blaenorol ym maes seryddiaeth (chwe grant mawr ar gyfer rheoli data rhwng mis Mehefin 2007 a mis Mehefin 2016, gyda chyfanswm o dros £1.5m) a'u defnyddio gyda'r data delweddu meddygol sydd ar gael yng Nghanolfan Ymchwil Delweddu’r Ymennydd Prifysgol Caerdydd (CUBRIC), gan alluogi ymchwilwyr ledled y byd i harneisio eu gwir botensial. Defnyddiwyd y deunydd a gynhyrchwyd yn y prosiect hwn yn llwyddiannus i gael cyllid pellach i barhau â'r fenter heriol hon (o STRC, cyfanswm o £185,000)”.

Ysgolion Academaidd: Yr Ysgol Mathemateg a’r Ysgol Meddygaeth

Ymchwilwyr: Yr Athro Anatoly Zhigljavsky (PI), yr Athro Valentina Escott-Price

Prif nod y prosiect oedd trefnu gweithdy tri diwrnod 'High-dimensional optimisation and big data' yn hydref 2018.

Roedd diwrnod cyntaf y gweithdy (a gynhaliwyd yn Llundain ym mis Hydref) yn ymwneud â dysgu peiriannol ac optimeiddio mewn hysbysebu ar y rhyngrwyd. Roedd yr ail a'r trydydd diwrnod (a gynhaliwyd ar 6 a 7 Tachwedd yng Nghaerdydd) yn ymdrin ag agweddau damcaniaethol ac algorithmig ystadegau a dysgu peiriannol mewn problemau data mawr gan gynnwys geneteg.

Gwahoddwyd nifer o arbenigwyr byd-eang i Gaerdydd i gyflwyno'r prif ddarlithoedd a chymryd rhan mewn problemau byd real. Y disgwyl oedd y byddai o leiaf ddau o'r papurau’n cael eu cyhoeddi mewn cyfnodolion ystadegol blaenllaw o ganlyniad i'r cydweithio a sefydlwyd yn y broses o baratoi a rhedeg y gweithdy.

Amcanion a gyflawnwyd

Cyflawnwyd prif amcanion y prosiect. Ymhlith y prif ddarlithwyr yn y gweithdy, roedd nifer yn ffigurau o statws rhyngwladol ac enw da rhagorol. Mae'r papurau a ddeilliodd o gydweithio newydd yn dal i gael eu paratoi.

O ganlyniad i'r gwaith a alluogwyd drwy'r gronfa ysgogi, mae cydweithio rhwng yr Ysgol Mathemateg a'r Ysgol Meddygaeth wedi cryfhau. Mae cydweithio newydd rhwng Mathemateg a Phrifysgol Milan (y grŵp dan arweiniad yr Athro Francesco Archetti) hefyd wedi'i sefydlu.

Ym mis Chwefror 2019 ymwelodd yr Athro Zhigljavsky â Milan i weithio gyda grŵp Archetti ar amrywiaeth o brosiectau'n ymwneud ag amrywiol gymwysiadau optimeiddio byd-eang mewn peirianneg. Mae'n bosibl y gellir disgwyl o leiaf un papur ar y cyd yn fuan o'r cydweithio hwn. Mae trafodaeth am gyflwyniad ar y cyd i sefydliad Marie Curie yn mynd rhagddi.

Sefydlwyd cydweithio defnyddiol arall gyda'r Athro Arthur Gretton o UCL. Mae cydweithio gyda grŵp Rhydychen ar optimeiddio dan arweiniad yr Athro Coralia Cartis hefyd wedi cryfhau yn sgil y gweithdy.

Effaith y gronfa sbarduno yw:

• digwyddiad data mawr safon uchel yng Nghaerdydd (gyda thros 100 o staff a myfyrwyr Prifysgol Caerdydd o wahanol adrannau'n bresennol)
• sefydlu cydweithio newydd ym meysydd dysgu peiriannol a data mawr a chryfhau cydweithio sydd eisoes yn bodoli.