Llwyddiant i'r myfyrwyr yn y Stomp
13/11/08
Cynhaliwyd Stomp lwyddiannus yn Undeb y Myfyrwyr nos Fercher 12fed Tachwedd, pryd y cafwyd cystadlu brwd rhwng myfyrwyr a staff Ysgol y Gymraeg.
Daeth dros 100 o fyfyrwyr ynghyd i fwynhau'r noson o farddoni a sylwebaeth ffraeth yng nghwmni Tudur Dylan Jones a Mererid Hopwood.
Cipiwyd y gadair gan Llŷr Lewis (myfyriwr Blwyddyn 3) am ei gywydd 'Cysur'. Llŷr hefyd a enillodd y goron, am y limrig orau. Tîm y myfyrwyr oedd yn fuddugol ar ddiwedd y noson.
Dyma ddarn o gywydd buddugol Llŷr Lewis:
Cysur (11.11.08)
Heno, pabi, nid pobol
Yn drwch a gludir ar drol
O gaeau'r Somme, a'r bomio,
Er y cur, yn llithro o'r co'
A phridd ac afonydd Ffrainc.
Ond diau bydd yr ieuainc
Yn ymladd a lladd mewn lle
Arall erbyn y bore.
O'n moeth, ac o'n esmwythyd
Fe'n deffrir â'r gwir i gyd.