Ysgol y Gymraeg

Tiwtor iaith sy'n dysgu ar y Cynllun Sabothol Cenedlaethol yw Rhiannon Marks. Mae Prifysgol Caerdydd yn un o dri lleoliad sydd yn cynnig y cynllun a ariennir gan Lywodraeth Cymru. Mae'n rhoi cyfle i ymarferwyr sy'n dymuno dysgu, darlithio neu hyfforddi drwy gyfrwng y Gymraeg neu'n ddwyieithog dderbyn hyfforddiant dwys ynghyd â methodoleg mewn dysgu cyfrwng Cymraeg a dwyieithog.

Mae Rhiannon hefyd yn dysgu ar gyrsiau iaith a llenyddiaeth myfyrwyr israddedig yr Ysgol.

Daw Rhiannon yn wreiddiol o Gil-y-Cwm yn Sir Gaerfyrddin. Graddiodd yn y Gymraeg ym Mhrifysgol Aberystwyth cyn cwblhau cwrs Meistr mewn Astudiaethau Menywod yng Ngholeg Iesu, Rhydychen. Dychwelodd i Aberystwyth i ysgrifennu traethawd PhD ar waith Menna Elfyn gan arbrofi â ffurf ‘beirniadaeth epistolaidd’. Ymddiddora Rhiannon mewn llenyddiaeth gyfoes, theori a beirniadaeth lenyddol, a chyfieithu llenyddol, a phan fydd cyfle mae hi’n hoff o ysgrifennu’n greadigol. Enillodd goron Eisteddfod Genedlaethol yr Urdd 2007, ac mae hi newydd gael ei phenodi’n gydolygydd cylchgrawn Tu Chwith.