Strategaeth Busnes ac Entrepreneuriaeth (MSc)
- Hyd: Blwyddyn
- Dull astudio: Amser llawn
Cwrs trosi
Cwrs trosi yw hwn. Mae cyrsiau trosi yn eich galluogi i astudio pwnc nad yw'n gysylltiedig â'ch gradd israddedig neu yrfa gyfredol, a'ch cefnogi gyda newid llwybr gyrfa.
Diwrnod agored
Dysgwch am astudio'n ôl-raddedig yma yn ystod ein Diwrnod Agored nesaf.
Pam astudio’r cwrs hwn
Datblygwch eich cynllun busnes eich hun ar gyfer menter newydd gyda chefnogaeth gan arbenigwyr academaidd ac entrepreneuriaid profiadol.
Goruchwyliaeth entrepreneuraidd
Cyfle i ddatblygu model busnes o dan oruchwyliaeth entrepreneur profiadol.
Cynllunio a chynnig
Cyfle i gynllunio a chyflwyno menter newydd ar gyfer busnes newydd neu sefydliad sy'n bodoli eisoes i banel o gyfalafwyr mentro.
Dysgu a deall gyda chymheiriaid
Ymunwch â rhaglen lle mae amrywiaeth yn cynnig fforwm ar gyfer trafodaeth a chyfle i ddeall sut mae busnes yn gweithio mewn gwahanol ddiwylliannau.
Yn gyfrifol yn gymdeithasol
Fel Ysgol Fusnes Gwerth Cyhoeddus gyntaf y byd, rydym wedi ymrwymo i sicrhau gwelliant cymdeithasol ochr yn ochr â datblygu economaidd.
Efallai y bydd rhai yn anghytuno, ond rydym ni’n gwybod y gellir dysgu entrepreneuriaeth. Ond nid yw’n hawdd. Mae’n gofyn am ysbryd penodol, i fod yn ddewr a chael meddwl agored, i fod yn chwilfrydig a chreadigol, dychmygus a delfrydgar. Mae’n rhaid i chi ailysgrifennu’r rheolau. Mentro. A dysgu o’ch camgymeriadau. Oes gennych chi’r hyn sydd ei angen?
Newid y byd yw ein busnes ni.
Mae ein cwrs MSc Strategaeth Busnes ac Entrepreneuriaeth wedi’i dylunio ar gyfer graddedigion o bob cefndir disgyblaethol sydd eisiau canfod ffyrdd newydd o wneud pethau, drwy lansio eu cwmni eu hunain neu ymuno â sefydliad sy’n bodoli eisoes mewn rôl datblygu neu dwf.
Rydym yn hyrwyddo diwylliant o fenter ymhlith ein myfyrwyr, a gafodd ei gydnabod pan dderbynion ni wobr Siarter Busnes Bach yn 2017. Byddwn yn eich helpu i wireddu eich potensial busnes, gan gynnig cyfleoedd i ddysgu gan fusnesau lleol a mentrau cymdeithasol.
Bydd ein tîm o arbenigwyr academaidd a phartneriaid busnes yn eich paratoi chi ar gyfer intrepreneuriaeth ac entrepreneuriaeth, gan eich helpu i archwilio’r amgylchedd economaidd y mae sefydliadau yn gweithredu ynddo, caffael cefnogaeth ariannol, rheoli datblygiadau arloesol a marchnata cynnyrch a gwasanaethau.
Byddant yn defnyddio ymchwil a gydnabyddir yn rhyngwladol ac enghreifftiau bywyd go iawn i’ch annog i fyfyrio ar safbwyntiau ac arferion, fel bod gennych chi’r hyn sydd ei angen i ddechrau eich menter busnes eich hun neu arloesi mewn sefydliad sy’n bodoli eisoes.
Achrediadau
Cardiff Business School is accredited by AACSB international - The Association to Advance Collegiate Schools of Business.
“Un peth gwych am y cwrs yw sut y caiff busnes ei addysgu trwy enghreifftiau a syniadau gwahanol, ac o bob math o feysydd. Mae wedi rhoi’r wybodaeth a’r sgiliau i fi adeiladu ar syniadau oedd gen i pan oeddwn i’n astudio cyfrifiadureg yn India a chreu busnes cyfan ohonynt.”
Ble byddwch yn astudio
Ysgol Busnes Caerdydd
Rydym yn Ysgol Busnes sydd wedi’i hachredu gan AACSB ac AMBA ac mae gennym bwrpas clir: cael effaith gadarnhaol yng nghymunedau Cymru a'r byd.
Meini prawf derbyn
Cwrs trosi yw hwn. Mae cyrsiau trosi yn eich galluogi i astudio pwnc nad yw'n gysylltiedig â'ch gradd israddedig neu'ch gyrfa bresennol, a'ch cefnogi gyda newid gyrfa. Nid oes angen gwybodaeth na gradd flaenorol yn y pwnc.
Er mwyn cael eich ystyried am gynnig ar gyfer y rhaglen hon bydd angen i chi fodloni'r holl ofynion mynediad. Ni fydd eich cais yn cael ei ddatblygu os na ddarperir yr wybodaeth a'r dystiolaeth a restrir.
Gyda'ch cais ar-lein, bydd angen i chi ddarparu:
- Copi o'ch tystysgrif gradd a'ch trawsgrifiadau sy'n dangos eich bod wedi cyflawni gradd anrhydedd 2:1 mewn unrhyw bwnc, neu radd ryngwladol gyfatebol. Os yw eich tystysgrif gradd neu ganlyniad yn yr arfaeth, llwythwch unrhyw drawsgrifiadau dros dro neu dystysgrifau dros dro.
- copi o'ch tystysgrif IELTS gyda sgôr gyffredinol o 6.5 gyda 5.5 ym mhob is-sgil, neu dystiolaeth o gymhwyster cyfatebol derbyniol. Dylech gynnwys dyddiad eich prawf disgwyliedig os yw'r cymhwyster hwn yn yr arfaeth. Os oes gennych dystiolaeth dderbyniol amgen, fel gradd israddedig a astudir yn y DU, rhowch hyn yn lle IELTS.
Os nad oes gennych radd, efallai y bydd eich cais yn cael ei ystyried ar sail eich profiad proffesiynol. Rhowch dystiolaeth ychwanegol i gefnogi'ch cais megis cyfeiriadau cyflogwr wedi'u llofnodi a'u dyddio.
Dyddiad cau ar gyfer ceisiadau
Rydym yn dyrannu lleoedd ar sail y cyntaf i'r felin, felly rydym yn argymell eich bod yn gwneud cais cyn gynted â phosibl. Fel arfer, bydd ceisiadau'n cau ddiwedd mis Awst ond gallant gau'n gynt os llenwir pob lle.
Broses ddethol
Byddwn yn adolygu eich cais ac os ydych yn bodloni'r holl ofynion mynediad, byddwn yn gwneud cynnig i chi.
Rhagor o wybodaeth am ofynion Iaith Saesneg.
Mae'n rhaid i ymgeiswyr sydd angen Fisa myfyriwr i astudio yn y DU gyflwyno cymhwyster iaith Saesneg derbyniol er mwyn bodloni gofynion UKVI (Fisâu a Mewnfudo y DU).
Euogfarnau troseddol
Nid yw'n ofynnol i chi gwblhau gwiriad DBS (Gwasanaeth Gwahardd Datgelu) na darparu Tystysgrif Ymddygiad Da i astudio'r cwrs hwn.
Os ydych ar hyn o bryd yn destun unrhyw amod trwydded neu gyfyngiad monitro a allai effeithio ar eich gallu i gwblhau eich astudiaethau'n llwyddiannus, bydd gofyn i chi ddatgelu eich cofnod troseddol. Mae'r amodau'n cynnwys, ond nid ydynt yn gyfyngedig i:
- mynediad i gyfrifiaduron neu ddyfeisiau sy'n gallu storio delweddau
- Defnyddio offer / dyfeisiau rhyngrwyd a chyfathrebu
- cyrion
- Rhyddid i symud
- cyswllt â phobl sy'n gysylltiedig â Phrifysgol Caerdydd.
Strwythur y cwrs
Mae’r MSc mewn Strategaeth Busnes ac Entrepreneuriaeth yn cynnwys elfennau a addysgir, darllen dan gyfarwyddyd, aseiniadau, sesiynau ymarferol, arholiadau ysgrifenedig a chynllun menter newydd.
Mae'r elfen a addysgir yn cwmpasu dau semester academaidd, pob un yn cwmpasu pedwar modiwl craidd.
Yn ystod Cam Un, byddwch yn mynychu darlithoedd, dosbarthiadau ymarferol a thiwtorialau, ynghyd â darllen dan gyfarwyddyd ac aseiniadau eraill.
Yn dilyn hyn, yng Ngham Dau, byddwch yn cynnal cynllun menter newydd. Nod y cynllun menter newydd yw integreiddio a chymhwyso cysyniadau, sgiliau a thechnegau craidd y cwrs yn gyfannol, yn eang ac mewn cyd-destun hunan-arweiniol, er mwyn llunio a chyflwyno cynllun cyflawn ar gyfer menter fusnes newydd.
Mae'r modiwlau a ddangosir yn esiampl o'r cwricwlwm arferol. Byddant yn cael eu hadolygu cyn blwyddyn academaidd 2024/25. Bydd y modiwlau terfynol yn cael eu cyhoeddi erbyn mis Medi 2024.
Byddwch yn ymgymryd â phedwar modiwl craidd ym mhob semester, pob un yn werth 15 credyd. Mae'r modiwlau hyn yn rhoi sylfaen drylwyr i chi yn y theori a'r sgiliau sydd eu hangen i ddod yn entrepreneur effeithiol.
Ar ôl cwblhau'r cyfnod a addysgir yn llwyddiannus, byddwch yn ymgymryd â Chynllun Menter Newydd. Mae hyn yn cynnwys cydrannau grŵp ac unigol ac mae'n eich galluogi i ddangos y damcaniaethau a'r technegau a ddatblygwyd yn y cyfnod a addysgir.
| Teitl modiwl | Côd modiwl | Credydau |
|---|---|---|
| Economeg a'r Amgylchedd Busnes | BST186 | 15 credydau |
| Creu Menter Newydd | BST188 | 15 credydau |
| Cyllid Entrepreneuraidd | BST189 | 15 credydau |
| Rheoli Arloesi | BST190 | 15 credydau |
| Twf a Datblygiad Menter | BST191 | 15 credydau |
| Marchnata Entrepreneuraidd | BST192 | 15 credydau |
| Arweinyddiaeth a Datblygiad Personol | BST193 | 15 credydau |
| Entrepreneuriaeth Trawsnewidiol ac Arloesi | BST195 | 15 credydau |
| Cynllun Menter Newydd | BST194 | 60 credydau |
Mae'r Brifysgol wedi ymrwymo i ddarparu amrywiaeth eang o opsiynau modiwl lle’n bosibl. Ond byddwch yn ymwybodol er y byddwn yn gwneud pob ymdrech i gynnig dewis, gall hyn gael ei gyfyngu mewn rhai amgylchiadau. Y rheswm am hyn yw'r ffaith mai dim ond nifer cyfyngedig o leoedd sydd ar gael ar rai modiwlau, a gaiff eu dyrannu ar sail y cyntaf i'r felin. Mae'n ofynnol i fodiwlau eraill sicrhau isafswm nifer o fyfyrwyr cyn gallu eu cynnal, er mwyn gwneud yn siŵr y gellir cyflwyno addysg o ansawdd priodol. Gall modiwlau gael eu cyfyngu oherwydd gwrthdaro yn yr amserlen hefyd, ac er bod y Brifysgol yn ymdrechu i amharu cyn lleied â phosibl ar eich dewis, byddai'n syniad da i chi ofyn am gyngor gan yr Ysgol berthnasol am y dewisiadau modiwl sydd ar gael.
Dysgu ac asesu
Sut y caf fy addysgu?
Caiff ein dulliau addysgu eu llywio’n helaeth gan ymchwil ac maen nhw’n cyfuno manylrwydd academaidd gyda pherthnasedd ymarferol. Mae ein cyfadran sydd o fri rhyngwladol yn cynnwys academyddion sydd ar flaen y gad o ran gwybodaeth o fewn eu maes. Maen nhw’n dod â’r gwersi maen nhw wedi eu dysgu o’u hymchwil ddiweddaraf i’r ystafell ddosbarth, gan eich galluogi i feddwl yn feirniadol am fusnes a chynnig enghreifftiau a senarios go iawn.
Byddwn yn darparu eich adnoddau addysgu a dysgu, ac yn ymateb i’ch anghenion a’ch safbwyntiau. O'ch rhan chi, bydd gofyn i chi wneud y gwaith angenrheidiol yn ystod a thu allan i’r sesiynau addysgu ffurfiol, a gwneud defnydd da o'r cyfleusterau a ddarperir.
Dulliau Addygsu
Mae'r rhan fwyaf o fodiwlau yn cynnwys cymysgedd o ddarlithoedd ac addysgu mewn grwpiau bach (dosbarthiadau, seminarau, gweithdai neu sesiynau tiwtorial).
Mewn darlith, bydd y darlithydd yn bennaf yn rhoi trosolwg o agwedd benodol ar gynnwys y modiwl (yn ogystal â chyfleoedd i chi ofyn cwestiynau a bod yn fyfyriol). Yna mewn dosbarthiadau a gweithdai, cewch gyfle i ymarfer technegau, trafod syniadau, cymhwyso cysyniadau a chyfnerthu eich dealltwriaeth yn y pwnc.
Sut y caf fy asesu?
Mae'r dulliau asesu'n amrywio o fodiwl i fodiwl ond, ar draws cynllun y radd yn gyffredinol, gallwch ddisgwyl cymysgedd o arholiadau, gwaith cwrs, traethodau, gwaith ymarferol, cyflwyniadau a phrosiectau unigol ac mewn grŵp.
Sut y caf fy nghefnogi?
Byddwch yn cael tiwtor personol ar ddechrau eich astudiaethau. Fel arfer, bydd eich tiwtor personol yn addysgu ar eich cwrs gradd chi a byddwch yn cadw’r un tiwtor personol drwy gydol eich cwrs.
Bydd eich tiwtor personol yn gallu rhoi cyngor i chi ar faterion academaidd, gan gynnwys dewis modiwlau ac asesu. Os cewch unrhyw broblemau sy'n effeithio ar eich astudiaethau, eich tiwtor personol yw eich pwynt cyswllt cyntaf bob tro. Bydd eich tiwtor yn gallu eich rhoi mewn cysylltiad ag ystod eang o wasanaethau cymorth arbenigol ar gyfer myfyrwyr a ddarperir gan y Brifysgol, ac Undeb y Myfyrwyr, fel y bo'n briodol. Bydd gofyn i chi gyfarfod â’ch tiwtor personol dair gwaith yn ystod pob blwyddyn academaidd, ond fe’ch anogir hefyd i gysylltu â nhw ar unrhyw adeg arall os oes angen help neu gyngor arnoch chi.
I gael gwybodaeth gyffredinol, mae staff ein Hyb Myfyrwyr Ôl-raddedig ar gael, yn bersonol, dros y ffôn neu trwy ebost, rhwng 8am a 6pm bob dydd o'r wythnos yn ystod y tymor i ateb eich cwestiynau.
Adborth
Byddwn yn rhoi adborth i chi ar eich gwaith yn rheolaidd. Cyflwynir adborth mewn amrywiaeth o fformatau gan gynnwys adborth ar lafar, adborth personol ar waith ysgrifenedig, ac adborth ysgrifenedig cyffredinol.
Byddwch yn cael adborth cyffredinol mewn perthynas ag arholiadau ar ôl pob cyfnod arholi a byddwch yn gallu trafod eich perfformiad cyffredinol gyda'ch tiwtor personol.
Wrth weithio ar eich traethawd hir/prosiect, mae disgwyl i chi gyfarfod â’ch goruchwylydd yn rheolaidd i adolygu eich cynnydd a thrafod unrhyw gwestiynau. Bydd eich goruchwylydd yn gallu rhoi adborth i chi ar eich cynllun ymchwil ac ar ddrafftiau o’ch gwaith wrth i chi weithio arnynt.
Pa sgiliau y byddaf yn eu hymarfer a’u datblygu?
Drwy ymgysylltu’n llawn â’r cwrs hwn, byddwch yn caffael ac yn datblygu amrywiaeth o sgiliau gwerthfawr, yn rhai penodol i’r ddisgyblaeth a ‘sgiliau cyflogadwyedd’ mwy cyffredinol. Bydd y rhain yn fodd i chi:
- Deall pynciau cymhleth gyda hyder
- Gofyn y cwestiynau iawn am destunau cymhleth.
- Cael gwerthfawrogiad llawn dychymyg o safbwyntiau a dewisiadau gwahanol a dadansoddi'r rhain yn feirniadol
- Nodi a defnyddio data perthnasol
- Datblygu sgiliau ymchwil ymarferol
- Cynnig eich atebion llawn dychymyg eich hun yn seiliedig ar dystiolaeth
- Cyfathrebu'n glir, yn gryno ac yn argyhoeddiadol yn ysgrifenedig ac ar lafar
- Dod o hyd i wybodaeth rifol berthnasol, ei dehongli a'i chyflwyno; i gefnogi sail adroddiadau prosiect ac achosion busnes;
- Gweithio yn ôl terfynau amser a blaenoriaethau, a rheoli amrywiaeth o dasgau ar yr un pryd
- Gweithio’n rhan o dîm, gan ddatblygu dull cydweithredol o ddatrys problemau
- Defnyddio rhaglenni TG a phecynnau meddalwedd safonol, lle bo hynny'n briodol
- Cymryd cyfrifoldeb dros eich rhaglen ddysgu a’ch datblygiad proffesiynol eich hun.
Ffioedd dysgu ar gyfer dechrau astudio yn 2024
Bydd eich ffioedd dysgu a sut y byddwch yn eu talu yn dibynnu ar eich statws ffioedd. Gallai eich statws ffioedd fod yn statws cartref, ynysoedd neu tramor.
Dysgwch sut rydym yn pederfynu eich statws ffioedd
Ffioedd am statws cartref
| Blwyddyn | Ffioedd Dysgu | Blaendal |
|---|---|---|
| Blwyddyn un | £12,200 | Dim |
Myfyrwyr o'r UE, AEE a'r Swistir
Os ydych chi'n wladolyn o'r UE/AEE neu'r Swistir, bydd eich ffioedd dysgu ar gyfer 2024/25 yn unol â'r ffioedd tramor a godir ar fyfyrwyr rhyngwladol, oni bai eich bod yn gymwys i gael statws ffioedd y DU. Mae UKCISA wedi darparu gwybodaeth am Brexit a ffioedd dysgu.
Ffioedd am statws ynys
Dysgwch ragor am ffioedd ol-raddedig i fyfyrwyr o Ynysoedd y Sianel ac Ynys Manaw.
Ffioedd am statws tramor
| Blwyddyn | Ffioedd Dysgu | Blaendal |
|---|---|---|
| Blwyddyn un | £27,200 | £2,500 |
Rhagor o wybodaeth am ffioedd dysgu a blaendaliadau, gan gynnwys ar gyfer myfyrwyr rhan-amser a pharhaus.
Cymorth ariannol
Gallai cymorth ariannol fod ar gael ar gyfer unigolion sy'n bodloni rhai meini prawf. Cewch ragor o wybodaeth yn ein hadran arian. Dim ond hyn a hyn o gymorth ariannol y gall y ffynonellau hyn eu cynnig, felly ni allwn warantu y bydd pawb sy'n bodloni'r meini prawf yn cael arian.
Costau ychwanegol
Costau byw
Rydym wedi ein lleoli yn un o ddinasoedd mwyaf fforddiadwy y DU. Rhagor o wybodaeth am gostau byw yng Nghaerdydd.
Arian
Gyrfaoedd graddedigion
Yn Ysgol Busnes Caerdydd, cewch addysg fydd yn newid eich gyrfa gan academyddion o safon fyd-eang sydd â safbwyntiau gwahanol. Byddant yn herio eich ffordd o feddwl wrth i chi ystyried y byd busnes o ystod o safbwyntiau gwahanol.
Ar ein cwrs MSc Strategaeth Busnes ac Entrepreneuriaeth, byddwch yn elwa ar wybodaeth ac arbenigedd ein Tîm Gwella Gyrfaoedd. Maent yn barod ac yn aros i ganfod digwyddiadau a chyfleoedd i’ch helpu i gyflawni eich dyheadau yn y dyfodol.
Rydym wedi datblygu perthnasoedd sy’n amrywio o’r cwmnïau rhyngwladol mwyaf i’r microfusnesau lleiaf, a’r rhai hynny’n cynnwys amrywiaeth eang o fentrau cymdeithasol a chwmnïau cydweithredol. Rydym yn defnyddio’r rhwydweithiau hyn i sicrhau gwerth i’n myfyrwyr, a hynny trwy sicrhau a threfnu’r canlynol:
- interniaethau ac astudiaethau achos o’r byd go iawn
- cydweithrediad â’n Hentrepreneuriaid Gwerth Cyhoeddus Preswyl
- darlithoedd gwadd
- tripiau maes a gweithdai.
Bydd y profiad amrywiol ac eang hwn yn helpu i hyrwyddo eich gyrfa ac yn dangos sut y gallwch wneud gwahaniaeth ar y daith.
Mae graddedigion MSc mewn Strategaeth Busnes ac Entrepreneuriaeth yn debygol o ddechrau eu busnesau eu hunain neu ymuno â chwmni sy'n canolbwyntio ar dwf busnes. Mae llawer o raddedigion hefyd wedi canfod bod y rhaglen yn arbennig o berthnasol i rolau o fewn busnesau teuluol.
Camau nesaf
Ymweliadau Diwrnod Agored
Cofrestrwch ar gyfer gwybodaeth am ein dyddiadau yn 2023.Gwnewch ymholiad
Cysylltwch â ni am ragor o wybodaeth am y cwrs hwn.Rhyngwladol
Mwy o wybodaeth am ein prifysgol fyd-eang.Data HESA: Hawlfraint yr Asiantaeth Ystadegau Addysg Uwch Cyfyngedig 2021. Ni all yr Asiantaeth Ystadegau Addysg Uwch Cyfyngedig dderbyn cyfrifoldeb am unrhyw gasgliadau neu benderfyniadau sy'n deillio o drydydd partïon o'i data. Daw'r data o Arolwg Hynt Graddedigion Diweddaraf 2019/20 a gyhoeddwyd gan HESA ym mis Mehefin 2022.
