Cipolwg ar Waith Gwyddonwyr yn Jyngl Borneo

02 Mehefin 2017

Wooden painted sign for Danau Girang Field Centre

Cyfres newydd yn arddangos Canolfan Maes Danau Girang a'r gwyddonwyr sy'n ceisio diogelu bywyd gwyllt Borneo.

Yn ddwfn yng nghanol jyngl Borneo mae cyfleuster anghysbell: Canolfan Maes Danau Girang. Mae'r cyfleuster cydweithredol hwn ar gyfer ymchwil a hyfforddiant, a reolir gan Adran Bywyd Gwyllt Sabah a Phrifysgol Caerdydd, ac yn cynnwys tîm o wyddonwyr ymchwil o Falaysia ac o wledydd eraill ledled y byd, ac yn gartref dros dro i fyfyrwyr o Brifysgol Caerdydd sy'n mynd ar Gwrs Maes Bioamrywiaeth y Brifysgol.

Mae cenhadaeth bwysig ymchwilwyr Danau Girang, sef monitro a gwarchod ecosystem drofannol unigryw, ar fin cael ei arddangos mewn cyfres newydd 10-rhan, fydd yn cael ei harddangos ar dudalen Facebook Danau Girang ac ar Scubazoo.tv.

Mae 'Borneo Jungle Diaries' yn rhoi cipolwg ar fywyd y tu ôl i'r llenni yn y Ganolfan. Mae'r newyddiadurwr ffotograffig amgylcheddol, Aaron 'Bertie' Gekoski yn dilyn gwyddonydd ac anifail gwahanol ym mhob episod, a'u dangos yn: tagio pangolin Sunda am y tro cyntaf; dal babanod crocodeilod a pheithoniaid enfawr yn y nos; arsylwi'n agos ar ymddygiad primatiaid nosol; olrhain haid o eliffantod, a llawer mwy.

"Rwy'n gobeithio y bydd y gyfres hon yn denu llawer o fyfyrwyr i Ganolfan Maes Danau Girang ac yn codi ymwybyddiaeth o'r bywyd gwyllt anhygoel yn ardal Kinabatangan, a pha mor bwysig yw gwarchod yr ecosystem hon," dywedodd Dr Benoit Goossens, Cyfarwyddwr y Ganolfan a Darlithydd yn Ysgol y Biowyddorau, Prifysgol Caerdydd.

Bydd yr episod cyntaf yn cael ei ddangos ddydd Llun 5 Mehefin i gyd-fynd â Diwrnod Amgylchedd y Byd, a bydd yr episodau nesaf yn cael eu rhyddhau bob dydd Llun am 9 wythnos, hyd at yr episod olaf ddydd Llun 7 Awst.

https://www.youtube.com/watch?v=3LBjDgvaeAw

Rhannu’r stori hon