Ewch i’r prif gynnwys

Dehongli Demoniaid

06 Ebrill 2017

Mae'r cynnwys hwn ar gael yn Saesneg yn unig.

Aramaic incantation bowl from Nippur (modern day Iraq)
image courtesy of the Penn Museum [Image #152805]

Cyhoeddir ymchwil i ddehongliadau Iddewig a Christnogol cynnar wrth i ysgolhaig o’r Brifysgol gael grant gan Gyngor Ymchwil y Celfyddydau a’r Dyniaethau

Bydd academydd arloesol ym maes Astudiaethau Crefyddol yn cynnal prosiect ymchwil newydd yn y DU ar ‘esboniadau demonaidd’, dull o ddehongli testunau cynnar sy’n cyfeirio at ddemoniaid.

Bydd prosiect Esbonio Demonaidd yn canolbwyntio ar rôl dehongli’r Beibl wrth lunio demonoleg Iddewig a Christnogol a’r rhyngweithio rhwng y ddwy gymuned ffydd.

Datblygwyd cyfres eang o gredoau am ddemoniaid yn y ffydd Iddewig erbyn 500OC ac ystyriwyd bod y rhain yn rhan graidd o’r Ysgrythurau Iddewig. Er hyn, nid oes llawer o sôn am ddemoniaid yn y Beibl Iddewig ei hun.

Felly, sut, a pham, mae pobl yn credu bod y testunau hyn yn sôn am ddemoniaid?

Wrth ddod â’r astudiaeth o ddemonoleg, dehongli’r Beibl, a rhyngweithio Iddewig-Cristnogol yn y cyfnod Rabineg (70OC-c.500OC) ynghyd, bydd y prosiect tair blynedd hwn yn archwilio i’r ffenomenon diddorol hwn.

Arweinir y prosiect ymchwil gwerth £200,000 gan Dr Hector Patmore, darlithydd mewn Hebraig ac Iddewiaeth, a bydd yn gofyn:

  • Pa destunau Beiblaidd oedd yr Iddewon yn cysylltu â demoniaid?
  • Pryd cysylltwyd y testunau â demoniaid am y tro cyntaf?
  • Sut mae’r traddodiadau hyn yn perthyn i gredoau Cristnogol am ddemoniaid?

“Mae’r diddordeb mewn demonoleg Iddewig wedi cynyddu dros y degawdau diwethaf - yn enwedig ers cyhoeddi Sgroliau’r Môr Marw - ond nid yw’r berthynas rhwng hyn a dehongli’r Beibl wedi cael digon o sylw,” ychwanegodd Dr Patmore.

Bydd prosiect Esbonio Demonaidd yn dechrau ym mis Gorffennaf 2017 ac yn para tair blynedd tan 2020 gyda chymorth nawdd Cyngor Ymchwil y Celfyddydau a’r Dyniaethau.

Mae Dr Patmore ar secondiad ar hyn o bryd fel Cyfarwyddwr Astudiaethau yng Ngholeg St George, Jerwsalem. Mae’n ymchwilio i gyfieithu a dehongli’r Beibl Hebraeg yn y cynfyd yn ogystal â syniadau am ddrygioni a demonoleg yn y cynfyd.

Rhannu’r stori hon