Gwaith celf Atlas Llenyddol yn mynd ar daith

Mae sioe deithiol drwy Gymru gyfan sy'n arddangos gwaith celf newydd a gomisiynwyd i gefnogi'r Atlas Llenyddol rhyngweithiol ar-lein wedi dechrau.

Bydd yr arddangosfa am Rithganfyddiadau Cartograffig yn ymweld â chwe lleoliad ledled Cymru yn ystod y 12 mis nesaf, ac yn gorffen gyda digwyddiad chwe wythnos yn y Senedd ym Mae Caerdydd rhwng Ionawr a Chwefror 2020.

Mae Atlas Llenyddol, menter ar y cyd rhwng Prifysgol Caerdydd a Phrifysgol Abertawe ac mewn partneriaeth â Llenyddiaeth Cymru a Sefydliad Ymchwil Gymdeithasol ac Economaidd, Data a Dulliau Cymru(WISERD), yn plotio lleoliadau o gwmpas Cymru y mae nofelau Saesneg yn sôn amdanynt.

I gefnogi'r prosiect, comisiynwyd 12 artist i greu gwaith celf gwreiddiol i adlewyrchu pob llyfr:

• John Abell - Revenant gan Tristan Hughes (2008)
• Iwan Bala - Twenty Thousand Saints gan Fflur Dafydd (2008)
• Valerie Coffin Price - The Rebecca Rioter gan Amy Dillwyn (1880)
• Liz Lake - Shifts gan Christopher Meredith (1988)
• Richard Monahan - Aberystwyth Mon Amour gan Malcom Pryce (2009)
• George Sfougaras - The Hiding Place gan Trezza Azzopardi (2000)
• Joni Smith - Mr Vogel gan Lloyd Jones (2004)
• Amy Sterly - Pigeon gan Alys Conran (2016)
• Locus - Sheepshagger gan Niall Griffiths (2002)
• Rhian Thomas - Border Country gan Raymond Williams (1960)
• Seán Vicary - The Owl Service gan Alan Garner (1967)
• Cardiff University Student Project – Strike for a Kingdom gan Menna Gallie (1959)

Oriel Davies yn y Drenewydd yw'r lleoliad cyntaf i gynnal yr arddangosfa deithiol (9 Chwefror - 18 Mawrth), ac yna Pontio, Bangor (7 Mawrth - dyddiad gorffen i'w gadarnhau), Llyfrgell Genedlaethol Cymru, Aberystwyth (23 Mawrth - 8 Mehefin), Amgueddfa Abertawe (6 Gorffennaf - 8 Medi) a Galeri Caernarfon (13 Medi - 25 Hydref).

Meddai’r Athro Jon Anderson, o Ysgol Daearyddiaeth a Chynllunio Prifysgol Caerdydd, a arweiniodd y prosiect: "Mae nifer fawr o ymwelwyr wedi defnyddio'r wefan ac archwilio'r map rhyngweithiol ar gyfer pob un o'r 12 nofel ac yn datblygu eu dealltwriaeth o'r berthynas rhwng daearyddiaeth a llenyddiaeth."

Porwch drwy'r yr Atlas Lenyddol Rhyngweithiol, a gweld y gwaith celf dan sylw.

Rhagor o wybodaeth am y lleoliadau arddangos sydd i ddod.