Mae ‘Peint o Wyddoniaeth’ yn dychwelyd i dafarnau Caerdydd

Bydd gwyddoniaeth yn bwnc llosg mewn tafarnau yng Nghaerdydd y gwanwyn hwn wrth i ŵyl fwyaf y byd o sgyrsiau cyhoeddus ar wyddoniaeth ddychwelyd i’r brifddinas am yr eildro.

Yn ystod ‘Peint o Wyddoniaeth Caerdydd’, bydd 30 o wyddonwyr yn camu i’r llwyfan mewn amryw o dafarndai ledled Caerdydd i gynnal sgyrsiau sy’n hwyl, yn rhyngweithiol ac yn ennyn diddordeb, wrth sôn am eu pwnc ymchwil.

Bydd ymwelwyr yn y digwyddiad uwchben eu digon ag amserlen lawn dop o sgyrsiau, o’r ymchwil ddiweddaraf yn y frwydr yn erbyn clefyd Huntington i esboniad gwyddonol ynghylch pam nad yw dod o hyd i gariad ar-lein yn gweithio.

Yn ôl un o’r ymchwilwyr sy’n cymryd rhan, Dr Emma Yhnell o Ysgol Meddygaeth Prifysgol Caerdydd: “Ar ryw adeg yn ein bywydau rydym i gyd yn gleifion ac ni ddylai fod ofn arnom ofyn cwestiynau, holi gwyddonwyr, ac yn bwysicaf oll, dysgu rhywbeth newydd. Mae Peint o Wyddoniaeth yn caniatáu i'r cyhoedd ymgysylltu â gwyddonwyr a thrafod eu hymchwil mewn amgylchedd anffurfiol a hamddenol.”

Ynghyd â'r prif sgyrsiau, bydd pob noswaith hefyd yn cynnwys amrywiaeth o weithgareddau hwyliog yn ymwneud â gwyddoniaeth gan gynnwys posau geeky, straeon difyr a gweithgareddau rhyngweithiol eraill.

Bydd y digwyddiad tri diwrnod o hyd yn cael ei gynnal ar yr un pryd mewn dros 100 o ddinasoedd ar draws 12 o wledydd rhwng 14 a 16 Mai 2018.

Bydd gwyddonwyr Caerdydd yn siarad mewn tafarndai, gan gynnwys y Philharmonic, Tiny Rebel a 10-Feet Tall, gyda thocynnau yn costio £4 yn unig. Mae’r tocynnau, ynghyd ag amserlen lawn o ddigwyddiadau, ar gael o heddiw ymlaen ar wefan Peint o Wyddoniaeth (pintofscience.co.uk).

Sefydlwyd Peint o Wyddoniaeth chwe blynedd yn ôl gan grŵp o ymchwilwyr ôl-raddedig ac ôl-ddoethurol yn y DU ac mae wedi tyfu i fod yn un o wyliau gwyddoniaeth mwyaf y byd.

Mae’r sylfaenwyr, Dr Praveen Paul a Dr Michael Motskin, wedi cyflwyno elfen bersonol i wyddoniaeth, gan roi cyfle i bawb gwrdd â'r bobl y tu ôl i'r ymchwil anhygoel sy’n cael ei chynnal ar draws y byd.

“Mae cymaint o ymchwil gyfareddol yn cael ei chynnal o dan ein trwynau, nad ydym yn gwybod amdani,” meddai cyd-sylfaenydd yr ŵyl, Dr Paul.

“Gall rhai fynd ar goll yn yr eglurhad, gan arwain at newyddion ffug. Mae Peint o Wyddoniaeth yn cynnig mynediad uniongyrchol i bobl at wyddonwyr ysbrydoledig ac yn annog trafodaeth agored, ac mae’r cyfan yn digwydd yn y lle mwyaf cyfarwydd ym Mhrydain, y dafarn. Mae gwyddonwyr yn yfed peintiau hefyd – dydyn nhw ddim mor wahanol â hynny.”