Bywyd myfyriwr meddygol yng Nghaerdydd

Rydym o'r farn ein bod ymhlith yr ysgolion meddygaeth gorau yn y DU. Mae ein myfyrwyr yn cytuno hefyd.

Gwyliwch fideo Saesneg lle mae ein myfyrwyr meddygaeth yn trafod eu profiadau ym Mhrifysgol Caerdydd.

Beth sy'n ein gwneud ni'n arbennig?

Boddhad myfyrwyr

Mae lefel boddhad ein myfyrwyr yn cynyddu'n flynyddol gydag ein rhaglen MBBCh yn ennilll sgôr uchel iawn o 97% yn Arolwg Cenedlaethol y Myfyrwyr 2016 ac o ganlyniad, rydym yn gydradd drydydd yn y wlad.

Dysgu ar leoliad clinigol trwy Gymru gyfan

Mae Cymru yn wlad mor brydferth ac fel rhan o'r cwrs rydych yn cael y cyfle i ymarfer mewn amrywiaeth eang o gymunedau.

Zoe Candlish, dosbarth 2015

Mae gennym bartneriaethau ar draws y wlad sy'n golygu os ydych yn astudio gyda ni, bydd Cymru oll yn ystafell ddosbarth i chi.

Cewch brofiadau amrywiol a allai gynnwys ymdrin ag amddifadedd dinesig i ddelio gydag anhwylderau sy'n gysylltiedig ag amaethyddiaeth. Tra eich bod yn profi bywyd mewn prifddinas fywiog, byddwch hefyd yn cael y cyfle i ymarfer meddygaeth mewn lleoedd gwyliau, cymunedau gwledig tawel a threfi ôl-ddiwydiannol.

Bydd diwrnod iechyd gwledig ym mlwyddyn dau hefyd yn eich galluogi chi i ddysgu am ansawdd bywyd, fel gweithiwr gofal iechyd proffesiynol ac fel unigolyn. Dyma gyfle i glinigwyr sy'n dymuno cael profiad o fywyd mwy hamddenol.

Cyswllt cynnar â chleifion

Cysylltu â chleifion

Credwn yn gryf bod y cleifion yn ganolog i addysg feddygol.

O'r cychwyn cyntaf bydd eich astudiaethau'n canolbwyntio ar y cleifion a'u hanhwylderau. Byddwch yn dysgu am gyflyrau meddygol cyffredin gan gleifion go iawn yn ogystal â'u meddygon, mewn cyfleusterau dilys sydd ag offer o'r safon uchaf.

Byddwch yn dysgu ynglŷn â'r wyddoniaeth feddygol sy'n ymateb i'r clefydau hyn, ond hefyd byddwch yn dysgu am yr ochr ddynol i feddygaeth: i ddeall ac i helpu'r bobl sy'n byw gyda'r clefydau ac yn dioddef o'u herwydd.

Dysgu rhyngbroffesiynol

Rydym wedi cyflwyno dysgu rhyngbroffesiynol lle byddwch chi'n dysgu ochr yn ochr â myfyrwyr gydag arbenigeddau fel Fferylliaeth ac Optometreg. Bydd hyn yn eich galluogi chi i ddysgu amrywiaeth ehangach o sgiliau clinigol a chael y canlyniadau gorau i'ch cleifion.

Ym mlwyddyn 2, byddwch hefyd yn dysgu wrth ddoctoriaid a pharafeddygon ynglŷn â sut i ymateb i argyfwng drwy gymryd rhan mewn sefyllfa sy'n ail greu damwain ffordd wledig realistig.

Dysgu ar sail achosion (CBL)

Mae ein hymagwedd dysgu ar sail achosion yn cadw'r claf yng nghanol eich astudiaethau.

Myfyrwyr yn gwneud hyfforddiant sgiliau clinigol.

Drwy ddysgu mewn grwpiau bychan, darlithoedd sydd wedi'u cydlynu, lleoliadau clinigol, hyfforddiant sgiliau clinigol ac astudio hunan-gyfeiriedig, rydym yn cyfuno amrywiaeth o ddisgyblaethau er mwyn integreiddio gwyddoniaeth, gwyddoniaeth cymdeithasol ac ymarfer clinigol.

Rydym yn canolbwyntio arnoch chi ac ar eich addysg: byddwn yn eich cefnogi wrth i chi gymryd mwy o gyfrifoldeb dros eich dysgu. Byddwn yn eich annog hefyd i weithredu ar eich liwt eich hun i fanteisio ar y cyfleoedd a'r profiadau fydd ar gael i chi fel myfyriwr ac fel meddyg wedi hynny.

Sbiral arloesol

Yn ystod pob blwyddyn astudio, byddwch yn ailedrych ar broblemau clinigol cyffredin ac adeiladu ar beth rydych wedi dysgu eisoes. Mae hyn yn golygu bydd hi'n haws cofio gwybodaeth newydd a'i rhoi mewn cyd-destun clinigol pan rydych yn gweld cleifion.

Addysgu a arweinir gan ymchwil

Bydd gwaith ymchwil gwyddonol yn mynd yn ei flaen drwy'r holl Ysgol. Bydd llawer o'ch athrawon eu hunain yn ymchwilwyr sydd ag enw da yn rhyngwladol.

Cewch y cyfle i gyfrannu os hoffech gymryd mantais o hynny. Mae cymryd rhan mewn ymchwil yn rhoi mewnwelediad gwych i chi o'r wyddoniaeth sydd y tu ôl i'r feddygaeth ac yn hogi eich sgiliau academaidd yn ogystal.

Cewch ddigonedd o gyfloedd i wneud ymchwil ac mae'r aelodau staff yn gyfeillgar a chefnogol. Mae'n amgylchedd gwych i hyfforddi ynddo.

Mike Atkinson, dosbarth 2014

Yn Fframwaith Rhagoriaeth Ymchwil y Llywodraeth yn 2014, daeth Prifysgol Caerdydd yn 5ed yn y DU am ansawdd ei hymchwil.

Byddwch chi'n cael y cyfle i siarad gyda'r ymchwilwyr hyn ac i gael mynediad i'w cyfleusterau gwaith hefyd.

Cewch y cyfle hefyd i ddysgu'r sgiliau cyfathrebu holl bwysig hynny sydd yn angenrheidiol i lwyddo fel meddyg.

Harmoneiddio

Mae gennym flwyddyn olaf arloesol sy'n helpu gyda'r pontio o fyfyriwr meddygol i feddyg y GIG.

Cymryd y cam olaf rhwng myfyriwr a doctor y GIG.

Gyda'ch arholiadau terfynol wedi'u cyflawni cyn i chi ddechrau blwyddyn pump, dyma'r flwyddyn lle gallwch ganolbwyntio ar ymarfer fel meddyg. Byddwch yn treulio llawer o'ch amser mewn ysbytai ac yn y gymuned, gyda lleoliad clinigol dewisol gartref neu dramor fydd yn eich galluogi i ddatblygu yn y maes sydd o ddiddordeb arbennig i chi.

Bydd eich lleoliad olaf yn dilyn meddyg sylfaen, a'r swydd hon byddwch chi'n ei chymryd unwaith i chi raddio os ydych chi'n dewis aros yng Nghymru. Mae hyn yn golygu nad yw eich diwrnod cyntaf fel 'FYI' yn ddechrau swydd newydd frawychus, ond yn rôl gyfarwydd rydych yn dychwelyd iddi mewn lle adnabyddus gyda phobl rydych yn eu hadnabod eisoes.